Калектыву Інстытута прававых даследаванняў НЦЗПІ прадстаўлены новы кіраўнік

5 лютага па ўзгадненні з Кіраўніком Адміністрацыі Прэзідэнта Рэспублікі Беларусь на пасаду намесніка дырэктара – кіраўніка Інстытута прававых даследаванняў НЦЗПІ назначаны Вадзім Паўлаў, кандыдат юрыдычных навук, прафесар.

Новага кіраўніка супрацоўнікам Інстытута прававых даследаванняў прадставіла Намеснік Кіраўніка Адміністрацыі Прэзідэнта Рэспублікі Беларусь Вольга Чупрыс.

Гаворачы аб выбары кандыдатуры, Вольга Іванаўна адзначыла асабістыя і прафесійныя якасці Вадзіма Іванавіча, які «з’яўляецца бліскучым навукоўцам, вядомым не толькі ў нашай краіне, але і за яе межамі, вынікам даследаванняў якога даецца высокая ацэнка ў навуковай супольнасці».

Жадаючы поспехаў новаму кіраўніку, Вольга Іванаўна падкрэсліла значныя вынікі навуковай дзейнасці цэнтра і выказала ўпэўненасць ва ўмацаванні гэтага патэнцыялу.

Дырэктар НЦЗПІ Андрэй Матэльскі падтрымаў пажаданне Намесніка Кіраўніка Адміністрацыі Прэзідэнта: «Рады, што Вы зараз працуеце ў нашай камандзе ў іншым статусе – кіраўніка Інстытута (раней Вадзім Паўлаў па сумяшчальніцтве працаваў у Інстытуце вядучым навуковым супрацоўнікам. – Заўв.). Я ўпэўнены, што ўсё атрымаецца, таму што ў Вас маюцца для гэтага ўсе неабходныя якасці».

Андрэй Францавіч адзначыў, што перад інстытутам стаяць важнейшыя задачы як у рамках узгодненага Адміністрацыяй Прэзідэнта Рэспублікі Беларусь плана навуковых даследаванняў, так і па заданнях Дзяржаўнай праграмы навуковых даследаванняў на 2026-2030 гады, у тым ліку па дасягненні практыка-арыентаваных вынікаў. Ён таксама звярнуў увагу на неабходнасць павышэння прывабнасці падрыхтоўкі навуковых работнікаў вышэйшай кваліфікацыі ў аспірантуры цэнтра.

У сваю чаргу Вадзім Іванавіч падзякаваў Намесніку кіраўніка Адміністрацыі Прэзідэнта Рэспублікі Беларусь і кіраўніку НЦЗПІ за аказаны давер і выказаў упэўненасць у забеспячэнні далейшай эфектыўнай работы па вырашэнні пастаўленых задач.

Калектыў НЦЗПІ віншуе Вадзіма Іванавіча і жадае яму натхнення, падтрымкі і важных дасягненняў!