Кібербяспеку і прафілактыку кіберзлачыннасці абмеркавалі ў цэнтры ў рамках адзінага дня інфармавання

19 лістапада ў НЦЗПІ адбылося інфармацыйнае мерапрыемства, прысвечанае тэме кібербяспекі і прафілактыкі кіберзлачыннасці. У якасці спікера выступіў начальнік Галоўнага ўпраўлення лічбавага развіцця папярэдняга следства цэнтральнага апарата Следчага камітэта Рэспублікі Беларусь Андрэй Матолька.

Андрэй Фёдаравіч адзначыў, што кібератакі сталі адной з галоўных стратэгічных пагроз нацыянальнай, эканамічнай і грамадскай бяспекі любой краіны. Беларусь не з'яўляецца выключэннем. Прыводзячы статыстычныя дадзеныя, спікер падкрэсліў, што колькасць кіберзлачынстваў за апошнія 10 гадоў павялічылася амаль у дзесяць разоў.

Прадстаўнік Следчага камітэта расказаў аб самых распаўсюджаных схемах махлярства. Гэта і званкі ад імя службовых асоб, і крадзеж грошай з банкаўскіх карт, і вымагальніцтва за разблакіроўку мабільнага, і продаж тавараў у мэсэнджэрах і сацсетках.

Андрэй Матолька падсумаваў, што трэба адказна падыходзіць да выканання патрабаванняў па кібербяспецы, праяўляць пільнасць і ўважлівасць. Неабходна элементарная лічбавая гігіена, пры якой захаванне простых правіл паводзін у Сетцы дазваляе абараніць персанальныя дадзеныя, фінансы і прылады ад кібермахляроў.

Таксама ён запэўніў, што адпаведнымі дзяржаўнымі органамі на высокім прафесійным узроўні вядзецца работа па процідзеянні кіберзлачыннасці.