Перамога Цэнтра ў штогадовым конкурсе «Вяршыня права»

У намінацыі «Навука і права» адзначаны зборнік навуковых артыкулаў НЦЗПІ «Сучаснае прыватнае права: выклікі і пераемнасць».

Ганаровы прыз арганізатара конкурсу – Міністэрства юстыцыі Рэспублікі Беларусь – быў уручаны рэдкалегіі выдання ў складзе галоўнага навуковага супрацоўніка аддзела даследаванняў у галіне грамадзянскага, экалагічнага і сацыяльнага права Інстытута прававых даследаванняў НЦЗПІ, загадчыка кафедры грамадзянскага права юрыдычнага факультэта БДУ, доктара юрыдычных навук, дацэнта Марыі Мяшчанавай, намесніка кіраўніка Інстытута – начальніка аддзела даследаванняў у галіне грамадзянскага, экалагічнага і сацыяльнага права Інстытута прававых даследаванняў НЦЗПІ, кандыдата юрыдычных навук, дацэнта Вольгі Бакіноўскай, загадчыка кафедры права інтэлектуальнай уласнасці юрыдычнага факультэта БДУ, кандыдата юрыдычных навук, дацэнта Алены Свадкоўскай.

Зборнік уключае навуковыя артыкулы, падрыхтаваныя ў рамках выканання навукова-даследчых работ НЦЗПІ «Трансфармацыя дагаворнага права Рэспублікі Беларусь у сучасных умовах», «Напрамкі развіцця прававога становішча суб'ектаў эканамічных адносін і іх аб'яднанняў (канцэрнаў, холдынгаў і інш.)», а таксама матэрыялы міжнароднай навукова-практычнай канферэнцыі, прысвечанай 100-годдзю доктара юрыдычных навук, прафесара Васіля Фёдаравіча Чыгіра (24 верасня 2024 г., г. Мінск, Беларускі дзяржаўны ўніверсітэт).

У зборніку асветлена праблематыка рамачных і неназваных дагавораў, інвестыцыйных дагавораў, дагавораў платнага аказання медыцынскіх паслуг і паслуг па аздараўленчым турызме, дагавораў будаўнічага падраду, лізінгу, іншых дагавораў; раскрыты пытанні карпаратыўных адносін, прававога рэжыму маёмасці дзяржаўных юрыдычных асоб, аховы аб'ектаў інтэлектуальнай уласнасці і інш.

Такая высокая ацэнка вынікаў навуковай дзейнасці НЦЗПІ і зместу рознабаковых дакладаў канферэнцыі падкрэслівае іх дзяржаўную, сацыяльную і эканамічную значнасць, пераемнасць навуковай традыцыі з адначасовым наватарскім падыходам да вырашэння навуковых задач.

Даведачна:

Конкурс «Вяршыня права» штогод праводзіцца Міністэрствам юстыцыі па розных намінацыях з мэтай давядзення да шырокага кола грамадскасці інфармацыі аб праблемах і дасягненнях у сферы права.