Прадстаўнікі Цэнтра правялі лекцыі для слухачоў Акадэміі кіравання

20 сакавіка прадстаўнікі НЦЗПІ правялі лекцыі для слухачоў адукацыйнай праграмы павышэння кваліфікацыі “Удасканаленне дзейнасці юрыдычных службаў дзяржаўных органаў” Акадэміі кіравання пры Прэзідэнце Рэспублікі Беларусь. Мерапрыемства праходзіла на базе Цэнтра.

Гасцей вітала намеснік дырэктара НЦЗПІ Ірына Чупракова. Ірына Адамаўна распавяла пра апошнія змены ў структуры арганізацыі, адзначыўшы, што з моманту заснавання НЦЗПІ ключавыя працэсы, якія тычацца нарматворчасці, яго метадалагічнай і інфармацыйнай падтрымкі, былі сканцэнтраваны ў адным месцы. Такім чынам, мерапрыемствы, арганізаваныя пры ўдзеле экспертаў Цэнтра, прадастаўляюць выдатную магчымасць не толькі пашырыць свае веды ў гэтай галіне, але і атрымаць кансультацыі ад высокакваліфікаваных спецыялістаў.

Начальнік аддзялення тэхналагічнага забеспячэння інфармацыйных сэрвісаў упраўлення інфармацыйнай палітыкі і інтэрнэт-рэсурсаў Сяргей Цымбарэвіч распавёў аб дзяржаўных інфармацыйна-прававых рэсурсах, якія забяспечваюць электронную камунікацыю дзяржавы і грамадства, – Нацыянальным прававым Партале і Прававым форуме Беларусі.

Начальнік упраўлення рэдакцыйна-выдавецкіх работ Наталля Судзілоўская падрабязна асвятліла тэму афіцыйнага апублікавання нарматыўных прававых актаў.

Аб функцыянальных магчымасцях і напрамках развіцця аўтаматызаванай інфармацыйнай сістэмы, якая забяспечвае лічбавы фармат нарматворчасці (АІС НРПА), праінфармаваў начальнік упраўлення лічбавізацыі нарматворчай дзейнасці Аляксандр Мядзведзь.

Ключавыя аспекты абавязковай юрыдычнай экспертызы нарматыўных прававых актаў (іх праектаў) растлумачылі начальнік аддзела метадалогіі нарматворчай дзейнасці галоўнага ўпраўлення канстытуцыйнага і міжнароднага права Алена Жыгалка і начальнік упраўлення абавязковай юрыдычнай экспертызы тэхнічных нарматыўных прававых актаў Андрэй Лагачоў.

Удзел у мерапрыемстве прынялі кіруючыя кадры юрыдычных службаў мясцовых выканаўчых і распарадчых органаў і асобы, уключаныя ў рэзерв на гэтыя пасады.

Занятак праходзіў у рамках работы, якая праводзіцца Цэнтрам па павышэнні кваліфікацыі спецыялістаў нарматворчых органаў краіны.

Аналагічныя мерапрыемствы адбыліся 5–6 лютага. Падрабязней па спасылцы.