Пытанні суадносін права і культуры абмеркавалі ў міжнародным фармаце

13 лютага прадстаўнікі Інстытута прававых даследаванняў НЦЗПІ прынялі анлайн-удзел у круглым стале з міжнародным удзелам «Права і Культура: Уздзеянне або Узаемадзеянне», арганізаваным Цэнтрам даследавання права і культуры юрыдычнага факультэта Федэральнай дзяржаўнай бюджэтнай адукацыйнай установы вышэйшай адукацыі «Дзяржаўны акадэмічны ўніверсітэт гуманітарных навук» пры падтрымцы Усерасійскай асацыяцыі гісторыкаў права.

З дакладам «Прававая культура і чалавек: вопыт спасціжэння ў антрапалогіі права» выступіў намеснік дырэктара НЦЗПІ – кіраўнік Інстытута Вадзім Паўлаў. Вадзім Іванавіч раскрыў аспекты разумення прававой культуры з пазіцый ідэі чалавекамернасці права.

У рабоце таксама прынялі ўдзел начальнік аддзела даследаванняў у галіне дзяржаўнага ладу і інфармацыйнага права Інстытута Аксана Станкевіч і навуковыя супрацоўнікі названага аддзела Іван Касцян і Наталля Чарнецкая.

На палях мерапрыемства разгледжаны тэарэтыка-метадалагічныя, гістарычныя і прыкладныя пытанні суадносін права і культуры ў сацыяльна-гуманітарным дыскурсе – ад фундаментальных канцэптаў прававой культуры, культурнага коду да актуальных праяў: нарматыўнага рэгулявання культурнай дзейнасці, абароны культурнай спадчыны, моўнага і рэлігійнага плюралізму, ролі традыцый у правапрымяненні, лічбавай трансфармацыі культурных практык і іх юрыдычнага суправаджэння.