Разам з усёй краінай. Рэгіянальныя філіялы Цэнтра прынялі ўдзел у святочных мерапрыемствах да Дня Незалежнасці

3 ліпеня мы адзначылі галоўнае дзяржаўнае свята – Дзень Незалежнасці Рэспублікі Беларусь. Па ўсёй краіне прайшлі ўрачыстыя і тэматычныя мерапрыемствы, іх удзельнікамі па традыцыі сталі работнікі Цэнтра ва ўсіх рэгіёнах Беларусі.

Правялі адкрыты дыялог з моладдзю

Напярэдадні свята дырэктар РЦПІ Брэсцкай вобласці Юрый Сегенюк узяў удзел у дыялогавай пляцоўцы на тэму «Гістарычны шлях беларускага народа – аснова ўмацавання суверэнітэту Рэспублікі Беларусь». У мерапрыемстве, што праходзіла ў Брэсцкай крэпасці-героі, уздзельнiчалi прадстаўнікі грамадскіх арганізацый, палітычных партый і моладзевы актыў г. Брэста.

Аддалі даніну павагі героям Брэсцкай крэпасці

3 ліпеня супрацоўнікі РЦПІ Брэсцкай вобласці ўзялі удзел ва ўрачыстым мітынгу ў Брэсцкай крэпасці-героі, дзе ўшанавалі памяць загінулых у гады Вялікай Айчыннай вайны хвілінай маўчання і ўсклалі кветкі да Вечнага агню, аддаўшы даніну павагі ўсім воінам, дзякуючы подзвігу якіх наша Рэспубліка Беларусь – суверэнная і незалежная.

Ушанавалі памяць вызваліцеляў г. Мінска

РЦПІ г. Мінска традыцыйна прыняў удзел ва ўскладанні кветак да помніка вялікаму палкаводцу, маршалу Савецкага Саюза, чатыры разы Герою Савецкага Саюза Георгію Жукаву ў сталічным скверы, які носіць яго імя.

«Маршал Жукаў адыграў адну з ключавых роляў у набыцці Беларуссю незалежнасці, вызваленні нашай краіны ад нямецка-фашысцкіх захопнікаў. Ускладаючы кветкі да бюста вялікага палкаводца, мы ўшаноўваем памяць усіх вызваліцеляў нашай роднай зямлі», – сказаў Руслан Века, дырэктар РЦПІ г. Мінска.

Прынялі ўдзел у мітынгу-рэквіеме

Работнікі РЦПІ Мінскай вобласці 2 ліпеня прынялі ўдзел у мітынгу-рэквіеме і ўсклалі кветкі да мемарыяла на месцы лагера смерці «Шталаг-352» у Масюкоўшчыне.

«Сёння мы тут, каб ушанаваць памяць усіх, хто абараняў нашу зямлю ў цяжкія гады Вялікай Айчыннай вайны і выратаваў свет ад фашызму», – сказаў дырэктар філіяла НЦЗПІ Руслан Трухан.

Даведка

Лагер «Шталаг-352» фашысты арганізавалі ў ліпені 1941 года. Баракі сталі перавалачнай базай для савецкіх ваеннапалонных перад адпраўкай у Германію. «Шталаг-352» – адзін з найбуйнейшых лагераў смерці на землях акупаванай Беларусі. Ад мучэнняў, голаду і пакаранняў смерцю тут загінулі больш за 80 тысяч вязняў.

Далучыліся да гісторыі роднага краю

Напярэдаднi Дня Незалежнасці Рэспублікі Беларусь калектыў РЦПІ Віцебскай вобласці наведаў экспазіцыю ў Віцебскам абласным краязнаўчым музеі, прысвечаную падзеям Вялікай Айчыннай вайны 1941–1945 гг.

На працягу 75 гадоў музей з’яўляецца носьбітам гістарычнай памяці аб подзвігу беларускага народа ў гады Вялікай Айчыннай вайны. У фондах музея захоўваюцца асабістыя рэчы Герояў Савецкага Саюза П.М.Машэрава, Ф.Ц.Блахіна, М.П.Шмырова і інш., а таксама асабістыя рэчы, узнагароды, дакументы і фатаграфіі ўдзельнікаў партызанскага і падпольнага руху, салдат Чырвонай Арміі, якія прымалі ўдзел у абароне і вызваленні г. Віцебска і Віцебскай вобласці; фота акупаванага Віцебска; дакументы акупацыйных уладаў; прадметы, перададзеныя ў фонды музея пошукавымі групамі.

«Наш музей – адно з найбуйнейшых сховішчаў артэфактаў, звязаных з падзеямі перыяду Вялікай Айчыннай вайны. На свае вочы пабачыць дакументы, асабістыя рэчы, узнагароды, фатаграфіі тых, хто цаной свайго жыцця абараніў свабоду Віцебскага краю і нашай роднай Беларусі, асабліва шчымліва напярэдадні галоўнага дзяржаўнага свята. Дакладная колькасць загінулых на Віцебшчыне да нашых дзён не вызначана, але кожны абаронца жывы ў памяці ўдзячных нашчадкаў», – падзялілася сваімі думкамі дырэктар філіяла НЦЗПІ Ларыса Дорагава.

Наведалі тэматычныя выстаўкі

Напярэдадні святкавання Дня Рэспублікі работнікі РЦПІ Гродзенскай вобласці наведалі выстаўку «Доўгія дарогі вайны» ў Сенатарскай зале Новага замка.

Экспазіцыя ўключае ўнікальныя архіўныя фатаграфіі, што захавалі ключавыя моманты наступальных аперацый, асабістыя рэчы, дакументы, а таксама карціны мастакоў – удзельнікаў Вялікай Айчыннай вайны. У спецыялістаў РЦПІ Гродзенскай вобласці была магчымасць пабачыць дакументы і паказанні відавочнікаў, што выяўляюць маштаб трагедыі і веліч духу беларускага народа, які выстаяў у найцяжэйшых выпрабаваннях.

«Падобныя праекты падкрэсліваюць важнасць захавання гістарычнай памяці аб Вялікай Айчыннай вайне, важнасць пераемнасці пакаленняў і перадачы нашчадкам праўдзівай інфармацыі аб падзеях тых гадоў і служаць напамінам аб той цане, якую давялося заплаціць за мірнае жыццё», – падзяліліся ўражаннямі работнікі філіяла.

Работнікі РЦПІ Гомельскай вобласці наведалі выстаўку мастакоў Гомельскага рэгіёну «Салдату прысвячаецца», арганізаваную да Дня Незалежнасці Рэспублікі Беларусь у карціннай галерэі імя Г.Х.Вашчанкі.

Экспазіцыя ўмоўна падзелена на дзве часткі: работы на ваенную і антываенную тэматыку і работы, прысвечаныя прыгажосці роднай зямлі.

 «Менавіта гэта ўзаемадзеянне дзвюх сэнсавых ліній паміж сабой узмацняе адчуванне значнасці Перамогі ў Вялікай Айчыннай вайне для ўсяго беларускага народа», – падкрэсліла Яўгенiя Маiсейкiна, дырэктар РЦПІ Гомельскай вобласці.

Работнікі РЦПІ Магілёўскай вобласці наведалі персанальную выстаўку заслужанага мастака Расійскай Федэрацыі У.П.Абрамовіча «Шлях да незалежнасцi» ў Мастацкім музеі імя П.В.Масленікава, прымеркаваную да святкавання Дня Незалежнасці Рэспублікі Беларусь.

Творы мастака служаць напамінам аб сіле духу і подзвігах простых салдат. У сваіх работах жывапісец замацоўвае думку аб тым, што кожная гадавіна Перамогі – гэта вялікая падзея для народа, які многае зведаў і перажыў падчас нападзення і адраджэння.

«Сувязь паміж народамі Беларусі і Расіі мае глыбокія гістарычныя карані, што асабліва ярка праявіліся ў гады Вялікай Айчыннай вайны. Агульная Перамога над фашызмам – гэта падмурак, на якім ствараліся і ствараюцца сяброўскія адносіны, заснаваныя на ўзаемнай павазе і падтрымцы», – адзначыла Наталля Станкевіч, дырэктар РЦПІ Магілёўскай вобласці.

З Днём Незалежнасці, Беларусь!