РЦПІ Брэсцкай вобласці правёў сустрэчу з прадстаўнікамі моладзевага актыву рэгіёна

24 сакавіка прайшоў семінар для прадстаўнікоў моладзевых грамадскіх аб'яднанняў Брэсцкага рэгіёна і іх арганізацыйных структур, спікерамі якога выступілі прадстаўнікі РЦПІ Брэсцкай вобласці.

Дырэктар РЦПІ Брэсцкай вобласці Юрый Сегянюк распавёў аб Дзіцячым прававым сайце mir.pravo.by, які разлічаны не толькі на дзіцячую аўдыторыю. Ён таксама ўяўляе цікавасць для моладзі, бацькоў і педагогаў.

Юрый Сяргеевіч падкрэсліў значэнне рэсурсу для маладога пакалення як крыніцы інфармацыі аб правах дзяцей і падлеткаў у Беларусі, так і звестак па шэрагу пытанняў, такіх як бяспечнае карыстанне Інтэрнэтам, дапамога пры ўзнікненні праблем ва ўзаемаадносінах з аднагодкамі, павышэнне ўзроўню фінансавай граматнасці і г.д. «Дзіцячы прававы сайт – гэта спецыялізаваны рэсурс, які створаны, каб веды аб законах былі даступнымі, цікавымі і зразумелымі для моладзі», – адзначыў дырэктар РЦПІ Брэсцкай вобласці.

Дадаткова спікер правёў агляд заканадаўства на папулярную тэму па вядзенні блогаў у сацыяльных сетках і месенджарах, акцэнтаваўшы ўвагу, што прававую і аналітычную інфармацыю можна знайсці пры дапамозе дзяржаўных інфармацыйна-прававых рэсурсаў.

Вядучы спецыяліст РЦПІ Брэсцкай вобласці Ала Кравец заклікала прадстаўнікоў моладзевых аб'яднанняў карыстацца выключна праверанымі крыніцамі прававой інфармацыі, а ў пошуку якаснай прававой інфармацыі выкарыстоўваць Нацыянальны прававы Партал і ІПС «ЭТАЛОН» і «ЭТАЛОН-ONLINE».

Таксама Ала Анатольеўна расказала аб магчымасцях Прававога форуму Беларусі – афіцыйнай пляцоўкі для публічнага абмеркавання праектаў нарматыўных прававых актаў і збору прапаноў па пытаннях удасканалення заканадаўства.

Семінар завяршыўся актыўнай дыскусіяй, дзе ўдзельнікі дзяліліся сваімі думкамі і ідэямі па далейшым прасоўванні прававых ведаў сярод падрастаючага пакалення.

Мерапрыемства арганізавана галоўным упраўленнем юстыцыі Брэсцкага аблвыканкама. У ім прынялі ўдзел больш за 20 членаў Брэсцкай абласной арганізацыі «Беларускага рэспубліканскага саюза моладзі», маладзёжнага грамадскага аб'яднання «Бейсбольна-софтбольны клуб «Брэсцкія зубры», маладзёжнага спартыўнага грамадскага аб'яднання «Спарта Фэмалі» і Брэсцкага абласнога маладзёжнага сацыяльнага дабрачыннага грамадскага аб'яднання «Жыві малыш».