У адзінстве – сіла: у НЦЗПI прайшлі мерапрыемствы да Дня народнага адзінства

17 верасня ў гонар Дня народнага адзінства ў НЦЗПI адбылася ўжо традыцыйная акцыя «Збяром букет разам». Мерапрыемства, напоўненае духам патрыятызму, стала наглядным адлюстраваннем адзінства калектыву і павагі да гістарычнай спадчыны беларускага народа.

Калектыў Цэнтра ўнёс свой уклад у стварэнне сімвалічнага букета. Кожны работнік Цэнтра прыйшоў на працу з кветкамі, у тым ліку вырашчанымі на сваіх прысядзібных участках, якія ва ўрачыстай абстаноўцы былі аб'яднаны ў святочную кампазіцыю. «Гэта асаблівае свята для мяне. Я веру, што ў адзінстве наша сіла і будучыня Беларусі, – падзяліўся эмоцыямі работнік НЦЗПД Сяргей Аляхно. – Кветкі вырашчаны ў маім садзе. Яны сімвалізуюць уклад кожнага ў адзінства».

Сімвалічныя букеты актывісты першаснай прафсаюзнай арганізацыі, пярвічных арганізацый грамадскiх аб’яднанняў «Белая Русь», «Беларускі рэспубліканскі саюз юрыстаў» і «Беларускі рэспубліканскі саюз моладзі» ўсклалі да мемарыяла «Памяць» у г. Мінску, узведзенага на месцы брацкай магілы часоў Вялікай Айчыннай вайны. «Адзінства народа –залог росквіту і пераадолення любых нягод, – падкрэсліла першы намеснік дырэктара цэнтра Галіна Падразёнак. – Сёння кожны работнік Цэнтра, упрыгожыўшы букет сваёй кветкай, уклаў часціцу сваёй душы ў агульную справу захавання гістарычнай памяці аб гераічным мінулым беларускага народа і яго адзінстве. Агульнасць традыцый і мэтаў робіць нас мацнейшымі, мудрэйшымі, дабрэйшымі, дазваляе паспяхова адказваць на сучасныя выклікі і пагрозы, годна працаваць у імя росквіту нашай любімай Беларусі».

Даведачна

Дзень народнага адзінства – дзяржаўнае свята Рэспублікі Беларусь, адзначаецца штогод 17 верасня. Ён быў заснаваны Указам Прэзідэнта Рэспублікі Беларусь № 206 ад 7 чэрвеня 2021 года. Дата свята звязана з пачаткам вызваленчага паходу Чырвонай Арміі ў Заходнюю Беларусь 17 верасня 1939 года, у выніку якога адбылося ўз'яднанне беларускага народа. Дзень народнага адзінства сімвалізуе аднаўленне гістарычнай справядлівасці і пераемнасць пакаленняў. Свята заклікана падкрэсліць важнасць яднання беларускага народа, яго агульных каштоўнасцяў і традыцый.