У Цэнтры ў пашыраным фармаце абмеркавалі вынікі правядзення рэвізіі нарматыўных прававых актаў

26 і 27 лістапада ў НЦЗПІ адбыліся рабочыя сустрэчы па абмеркаванні вынікаў правядзення рэвізіі нарматыўных прававых актаў Савета Міністраў Рэспублікі Беларусь, рэспубліканскіх органаў дзяржаўнага кіравання, падпарадкаваных Ураду, іншых дзяржаўных органаў. Мерапрыемствы прайшлі з удзелам Намесніка Кіраўніка Адміністрацыі Прэзідэнта Рэспублікі Беларусь Вольгі Чупрыс, намесніка Кіраўніка Апарату Савета Міністраў Рэспублікі Беларусь Дзяніса Скабялкі, першага намесніка Міністра юстыцыі Рэспублікі Беларусь Наталлі Філіпавай, прадстаўнікоў Адміністрацыі Прэзідэнта, Апарату Савета Міністраў, кіраўнікоў юрыдычных службаў шэрагу іншых дзяржаўных органаў.

З уступным словам да ўдзельнікаў нарады звярнуліся дырэктар НЦЗПІ Андрэй Матэльскі і яго першы намеснік Галіна Падразёнак. Спікеры пазначылі мэты і механізм правядзення рэвізіі.

Даведачна

18 ліпеня 2024 г. адбылася сустрэча Прэзідэнта Рэспублікі Беларусь з суддзямі Канстытуцыйнага Суда, дзе Кіраўніком дзяржавы была пастаўлена задача правесці рэвізію заканадаўства, гэта значыць усіх нарматыўных прававых актаў, прынятых на падзаконным узроўні: пастаноў Урада, міністэрстваў, іншых дзяржаўных органаў. Мэта такой рэвізіі – скарачэнне прававога масіву, устараненне супярэчнасцей у прававым рэгуляванні, выяўленне падзаконных актаў, якія не адпавядаюць Канстытуцыі, законам і ўказам Прэзідэнта.

Прамое даручэнне па правядзенні свайго роду рэформы, што спросціць змест нарматыўных актаў, было дадзена Адміністрацыі Прэзідэнта і НЦЗПІ. У адпаведнасці з распараджэннем Кіраўніка Адміністрацыі Прэзідэнта ад 17 ліпеня 2024 г. № 83ра «О мерах по систематизации правовых актов» у Цэнтры было створана 9 рабочых груп, у іх склад увайшлі супрацоўнікі Адміністрацыі Прэзідэнта, НЦЗПІ, вучоныя і прадстаўнікі рэспубліканскіх органаў дзяржкіравання, пераважна іх юрыдычных службаў. За кожнай рабочай групай была замацавана свая «зона адказнасці» – канкрэтныя галіны заканадаўства, у рамках якіх аналізаваліся падзаконныя акты.

У ходзе праведзеных 26 і 27 лістапада мерапрыемстваў кіраўнікі рабочых груп Цэнтра Дзмітрый Буга і Кацярына Дабравольская паведамілі папярэднія вынікі аналізу ведамаснай нарматворчасці ў сферах экалагічнага, бюджэтна-фінансавага, падатковага, жыллёвага заканадаўства, заканадаўства аб сацыяльнай абароне і сацыяльным страхаванні, культуры, аховы здароўя, правоў дзіцяці, дэмаграфічнай бяспекі.

Пасля выступленняў дакладчыкаў адбыўся канструктыўны абмен меркаваннямі па выяўленых падчас правядзення рэвізіі праблемах, а таксама магчымых шляхах удасканалення заканадаўства аб нарматворчай дзейнасці з мэтай скарачэння прававога масіву.