Ушаноўваем працу навукоўцаў. У НЦЗПД прайшоў урачысты сход да Дня беларускай навукі

23 студзеня ў Цэнтры адбыўся ўрачысты сход працоўнага калектыву, прымеркаваны да святкавання Дня беларускай навукі, які штогод адзначаецца ў апошнюю нядзелю студзеня.

З віншавальнымі словамі да работнікаў НЦЗПІ звярнуўся дырэктар Цэнтра Андрэй Матэльскі, асабліва падкрэсліўшы ролю і значнасць работы вучоных у забеспячэнні развіцця дзяржавы і грамадства, у стварэнні трывалай асновы для камфортнага і стабільнага жыцця грамадзян.

Андрэй Францавіч адзначыў, што стратэгічная роля навукі пастаянна падкрэсліваецца Прэзідэнтам Рэспублікі Беларусь Аляксандрам Рыгоравічам Лукашэнкам. «Без навукі не можа быць краіны. І сёння такі момант, калі навука архіважная», – нагадаў усім прысутным словы кіраўніка дзяржавы дырэктар НЦЗПI. 

Юрыдычная навука служыць падмуркам для фарміравання эфектыўнай прававой сістэмы. Яна выконвае ключавую ролю ў выпрацоўцы практычных рэкамендацый для ўдасканалення заканадаўства і правапрымяняльнай практыкі.

Ва ўмацаванні дзяржаўнасці і павышэнні эфектыўнасці прававога рэгулявання грамадскіх адносін, па словах Андрэя Матэльскага, немалаважную ролю ўносяць навуковыя даследаванні агульнадзяржаўнага і галіновага прызначэння, якія праводзяцца супрацоўнікамі Інстытута прававых даследаванняў Цэнтра.

Дырэктарам Цэнтра падведзены некаторыя вынікі дзейнасці Інстытута прававых даследаванняў. За апошнія два гады праведзена больш за 9 навукова-даследчых работ. Іх вынікам стала выпрацоўка напрамкаў развіцця прававога становішча суб'ектаў эканамічных адносін і іх аб'яднанняў, распрацаваны прапановы па сістэмнай змене прававога рэгулявання дамоўных адносін, абумоўленых неабходнасцю актуалізацыі нацыянальных дагаворных мадэляў, закліканых забяспечваць рашэнне сучасных эканамічных задач. Таксама сфармуляваны канцэптуальна-прававыя асновы паслядоўнай рэалізацыі канстытуцыйнага прынцыпу сацыяльнай адказнасці і вызначаны падыходы па фарміраванні нацыянальнай мадэлі адказных паводзін суб'ектаў, распрацавана тэарэтычная база міжнародна-прававога забеспячэння і нацыянальнай рэгламентацыі абароны інтарэсаў Рэспублікі Беларусь і іншае.

Ключавыя навуковыя вынікі, атрыманыя ў рамках даследаванняў, апублікаваныя не толькі ў выданнях НЦЗПІ, але і ў іншых аўтарытэтных юрыдычных, у тым ліку замежных, часопісах, зборніках, манаграфіях. Тым самым забяспечана іх даступнасць для экспертнага азнаямлення і цытавання.

Навукоўцы НЦЗПІ прынялі ўдзел у больш чым 60 рэспубліканскіх і міжнародных навуковых і навукова-практычных мерапрыемствах. А ў ліку знакавых навуковых падзей, якія арганізуюцца і праводзяцца Цэнтрам, – Восеньская навуковая сесія, якая выступіла пляцоўкай для абмеркавання актуальных пытанняў развіцця права і дзяржавы.

Прыемнай часткай урачыстага сходу стала ўручэнне ўзнагарод работнікам Інстытута прававых даследаванняў. 

Андрэй Матэльскі адзначыў Ганаровай граматай за шматгадовую плённую працу, значны ўклад у рэалізацыю дзяржаўнай палітыкі ў сферы крымінальнага права, актыўную навукова-даследчую дзейнасць Мікалая Бабія, вядучага навуковага супрацоўніка аддзела даследаванняў у галіне нацыянальнай бяспекі, праваахоўнай дзейнасці і міжнароднага права, кандыдата юрыдычных навук, дацэнта.

Падзяка дырэктара Цэнтра за добрасумленнае выкананне працоўных абавязкаў, актыўную навукова-даследчую дзейнасць і эфектыўнае садзейнічанне ў рэалізацыі дзяржаўнай палітыкі ў сферы права аб'яўлена Наталлі Мінько, вядучаму навуковаму супрацоўніку аддзела даследаванняў у галіне грамадзянскага, экалагічнага і сацыяльнага права, кандыдату юрыдычных навук, дацэнту.

За шматгадовую і плённую працу па падрыхтоўцы і атэстацыі навуковых і навукова-педагагічных работнікаў вышэйшай кваліфікацыі Ганаровая грамата Вышэйшай атэстацыйнай камісіі Рэспублікі Беларусь уручана начальніку аддзела даследаванняў у галіне дзяржаўнага будаўніцтва і інфармацыйнага права, кандыдату юрыдычных навук, дацэнту Аксане Станкевіч.

Андрэй Францавіч павіншаваў таксама Ганну Арушаньянц, навуковага супрацоўніка аддзела даследаванняў у галіне грамадзянскага, экалагічнага і сацыяльнага права. Напярэдадні Дня беларускай навукі пастановай Прэзідыума Вышэйшай атэстацыйнай камісіі Рэспублікі Беларусь зацверджана рашэнне Савета па абароне дысертацый аб прысуджэнні Ганне Мікалаеўне вучонай ступені кандыдата юрыдычных навук.

Ва ўрачыстым сходзе прыняла ўдзел таксама выканаўчы дырэктар ГА «Беларускі рэспубліканскі саюз юрыстаў» Ірына Арлоўская, якая высока ацаніла працу навуковага калектыву, адзначыўшы яго значны ўклад у развіццё прававой сістэмы.

Пажадаўшы далейшых поспехаў у навуковых пошуках, за плённую працу па ўдасканаленні прававой сістэмы Рэспублікі Беларусь і развіцці прафесійнай культуры юрыстаў Ірына Арлоўская ўручыла Ганаровую грамату Саюза юрыстаў вядучаму навуковаму супрацоўніку аддзела даследаванняў у галіне грамадзянскага, экалагічнага і сацыяльнага права, кандыдату юрыдычных навук, дацэнту Юліі Амяльчэні.

Таксама шэраг работнікаў быў адзначаны падзякамі Саюза юрыстаў за садзейнічанне фарміраванню прававой дзяржавы і развіццю грамадзянскай супольнасці ў Рэспубліцы Беларусь, актыўны ўдзел у рэалізацыі статутных мэтаў і задач ГА «Беларускі рэспубліканскі саюз юрыстаў»:

Алена Перапяліца, вядучы навуковы супрацоўнік аддзела даследаванняў у галіне дзяржаўнага будаўніцтва і інфармацыйнага права, кандыдат юрыдычных навук, дацэнт;

Мікалай Колесень, навуковы супрацоўнік аддзела даследаванняў у галіне нацыянальнай бяспекі, праваахоўнай дзейнасці і міжнароднага права;

Аляксандра Міхнюк, навуковы супрацоўнік аддзела даследаванняў у галіне дзяржаўнага будаўніцтва і інфармацыйнага права.

У сценах Цэнтра была разгорнута выстава навуковых выданняў Інстытута прававых даследаванняў, а таксама прадстаўленая Прэзідэнцкай бібліятэкай Рэспублікі Беларусь экспазіцыя, якая сабрала не проста кнігі, а інтэлектуальную біяграфію нашай краіны і рэдкія выданні.